Warning: mysql_fetch_array(): supplied argument is not a valid MySQL result resource in /home/officium/www/www/martyrologium_romanum.php on line 85
Warning: mysql_free_result(): supplied argument is not a valid MySQL result resource in /home/officium/www/www/martyrologium_romanum.php on line 168
Tertio Kalendas Decembris
Romæ, via Salaria, natalis sanctorum Martyrum Saturnini senis, et Sisinii Diaconi, sub Maximiano Principe; quos, diu in carcere maceratos, iussit Urbis Præfectus in equuleum levari et attrahi nervis, fustibus ac scorpionibus cædi, deinde eis flammas apponi, et, depositos de equuleo, capite truncari.
Tolosæ sancti Saturnini Episcopi, qui, temporibus Decii, in Capitolio eiusdem urbis a Paganis tentus atque de summa Capitolii arce per omnes gradus præcipitatus est, atque ita, capite colliso, excussoque cerebro, et toto corpore dilaniato, dignam Christo animam reddidit.
Item passio sanctorum Paramonis et Sociorum trecentorum septuaginta quinque, sub Decio Imperatore et Aquilino Præside.
Ancyræ, in Galatia, sancti Philomeni Martyris, qui, in persecutione Aureliani Imperatoris, sub Felice Præside, igne probatus, manibus pedibusque ac demum capite clavis confixo, martyrium consummavit.
Verulis, in Hernicis, sanctorum Martyrum Blasii et Demetrii.
Tuderti, in Umbria, sanctæ Illuminatæ Virginis.
Et alibi aliorum plurimorum sanctorum Martyrum et Confessorum, atque sanctarum Virginum.
R. Deo gratias.